കുന്ദമംഗലം/ കോഴിക്കോട്: ഭർത്താവിനൊപ്പം ബൈക്കിൽ സഞ്ചരിക്കയായിരുന്ന യുവതി അമിത വേഗത്തിലെത്തിയ വാഹനമിടിച്ച് മരിച്ചു. ഇടിച്ച വാഹനം നിർത്താതെപോയി. റോഡിൽ തെറിച്ചുവീണ യുവതിയെ ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല.
പുതുപ്പാടി മലപുറം പള്ളിക്കുന്നുമ്മലിൽ താമസിക്കുന്ന ആച്ചിയിൽ പെരിങ്കല്ലമൂല നാജിയ ഷെറിൻ (26) ആണ് മരിച്ചത്. ഭർത്താവ് പുതുപ്പാടി മൈലള്ളാംപാറ കല്ലാഞ്ഞിമാട്ടുമ്മൽ നൗഫൽ പരി‍‍ക്കുകളോടെ രക്ഷപെട്ടു. കുന്ദമംഗലം ഉപ്പഞ്ചേരിമ്മൽതാഴം ബസ് സ്റ്റോപ്പിന് സമീപം ശനിയാഴ്ച പുലർച്ചെ നാലുമണിയോടെയായിരുന്നു അപകടം.
കോഴിക്കോട് മെഡിക്കൽകോളേജിൽ ചികിത്സയിലുള്ള സഹോദരനെ കാണാനായി പുതുപ്പാടിയിൽനിന്ന് പോകുമ്പോഴായിരുന്നു അപകടം. അതിവേഗത്തിൽ വന്ന വാഹനം ബൈക്കിനെ ഇടിച്ചുതെറിപ്പിച്ച് നിർത്താതെ പോവുകയായിരുന്നു. പിക്കപ്പ് വാനാണ് അപകടത്തിനിടയാക്കിയതെന്നാണ് പ്രാഥമിക നിഗമനം. വാഹനമിടിച്ച്റോഡിലേക്ക് തെറിച്ചുവീണ ഇരുവരെയും മെഡിക്കൽ കോളേജിലെത്തിച്ചെങ്കിലും നാജിയ മരിച്ചു. കബീർ-സാജിദ ദമ്പതിമാരുടെ മകളാണ് നാജിയ ഷെറിൻ. നഫീസത്തുൽ നിസ്റ ഏകമകളാണ്. സഹോദരങ്ങൾ: മുഹമ്മദ് ഹിജാസ്, മുഹമ്മദ് സിനാൻ, മുഹമ്മദ് സിദാൻ. കുന്ദമംഗലം പോലീസ് കേസെടുത്ത് അന്വേഷണം ആരംഭിച്ചു.
