കണ്ണൂർ: കണ്ണൂരിൽ ഓടിക്കൊണ്ടിരുന്ന ലോറിക്ക് തീപിടിച്ചു. മാതമംഗലത്ത് നിന്നും പ്ലൈവുഡ് കയറ്റി നാടുകാണിയിലേക്കു പോകുകയായിരുന്ന ലോറിക്കാണ് തീപിടിച്ചത്. എടക്കോം മഠംതട്ടിൽ വച്ച് ലോറിയുടെ എൻജിനിൽനിന്നു പുക ഉയരുന്നത് ശ്രദ്ധയിൽപ്പെട്ട ഡ്രൈവർ ലോറി നിർത്തുകയും അതിൽ നിന്നിറങ്ങുകയും ചെയ്തതിനാൽ ആളപായമുണ്ടായില്ല. ഡ്രൈവർ പുറത്തിറങ്ങിയ ഉടനെ തീ ആളിക്കത്തുകയുമായിരുന്നു.
ഇന്ന് പുലർച്ചെ പന്ത്രണ്ടിനായിരുന്നു സംഭവം. അപകടം നടന്ന് 15 മിനിറ്റുകൾക്കുള്ളിൽ തളിപ്പറമ്പിൽനിന്നും ഫയർഫോഴ്സെത്തി തീയണച്ചു.
ലോറിയുടെ ക്യാബിൻ ഉൾപ്പെടെ കത്തിനശിച്ചുവെങ്കിലും പെട്ടെന്ന് തീയണച്ചതിൽ പ്ലൈവുഡിന് തീ പിടിച്ചില്ല. തളിപ്പറമ്പ് ഫയർ സ്റ്റേഷനിലെ പ്രേമരാജൻറെ നേതൃത്വത്തിൽ അബ്ദുള്ള, വിജയ്, വൈശാഖ്, ബിനേഷ്, റാഷിദ്, മാത്യു, ധനഞ്ജയൻ എന്നിവരുടെ നേതൃത്വത്തിലാണ് തീയണച്ചത്.
