ബെംഗളൂരു: സഹൃത്തുക്കളെ കണ്ട് മടങ്ങുകയായിരുന്ന യുവതിക്ക് ലിഫ്റ്റ് നൽകി ബൈക്ക് യാത്രികന്‍ പീഡിപ്പിച്ചതായി പരാതി. ഞായറാഴ്ച പുലര്‍ച്ചെയാണ് സംഭവം. സുഹൃത്തുക്കളെ കണ്ട ശേഷം താമസസ്ഥലത്തേക്ക് മടങ്ങിയതായിരുന്നു യുവതി. അതിനിടെയാണ് പീഡനം നടന്നതെന്നാണ് പരാതി.
ബെംഗളൂരുവിലെ കോളേജില്‍ അവസാനവര്‍ഷ ബിരുദ വിദ്യാര്‍ഥിയായ യുവതി കോറമംഗലയില്‍ സുഹൃത്തുക്കളെ കണ്ട ശേഷം ഹെബ്ബഗോഡിയിലെ വീട്ടിലേക്ക് മടങ്ങുകയായിരുന്നു. യുവതി കൈകാണിച്ച് നിര്‍ത്തിയതിനെത്തുടര്‍ന്ന് ലിഫ്റ്റ് നല്‍കിയ ബൈക്ക് യാത്രികനാണ് പീഡിപ്പിച്ചതെന്നാണ് പ്രാഥമിക നിഗമനമെന്ന് ഈസ്റ്റ് സോണ്‍ അഡീഷണല്‍ കമ്മിഷണര്‍ രമണ്‍ ഗുപ്ത അറിയിച്ചു.
സംഭവത്തില്‍ ഒരു പ്രതിയേ ഉള്ളൂവെന്ന് പോലീസ് അറിയിച്ചു. അന്വേഷണം നടന്നുവരികയാണ്. യുവതിയില്‍നിന്നും കുടുംബത്തില്‍നിന്നും ലഭിച്ച വിവരങ്ങളുടെ അടിസ്ഥാനത്തില്‍ പ്രതിയ്ക്കായി തിരച്ചില്‍ ആരംഭിച്ചു. ഉടന്‍ പ്രതിയെ പിടികൂടാന്‍ കഴിയുമെന്നാണ് പ്രതീക്ഷയെന്ന് പോലീസ് അറിയിച്ചു.
