കോഴിക്കോട്: കോൺഗ്രസ് നേതാവ് ടി.എന്‍. പ്രതാപനെതിരെ ഫ്ലക്സ് ബോർഡുകള്‍. ഇന്നലെ കോഴിക്കോട് നഗരത്തിലാണ് ടിഎൻ പ്രതാപനെതിരെ ഫ്ലക്സ് ബോർഡുകള്‍ സ്ഥാപിക്കപ്പെട്ടത്. ലോക്സഭാ തെരഞ്ഞെടുപ്പിൽ കെ. മുരളീധരൻ പരാജയപ്പെട്ടുവെങ്കിലും കെ. മുരളീധരനെ പിന്തുണച്ചുകൊണ്ട് കോഴിക്കോട് നഗരത്തിലുൾപ്പെടെ ഫ്ലക്സുകൾ സ്ഥാപിക്കപ്പെട്ടിരുന്നു. അതിനാൽ തന്നെ മുരളീധരൻ അനുകൂലികളാണ് ഫ്ലെക്സിനു പിന്നിലെന്നാണ് ഒരു വിഭാഗത്തിന്റെ വാദം. ‘ചതിയന്‍ ടി.എൻ. പ്രതാപനെ മലബാറിന് വേണ്ട, തൃശൂർ ആർഎസ്എസിന് കൊടുത്ത നയവഞ്ചകന്‍’ എന്നീ വാക്യങ്ങളാണ് ബോർഡുകളിലുള്ളത്. തദ്ദേശ തെരഞ്ഞെടുപ്പുമായി ബന്ധപ്പെട്ട് ടി.എന്‍. പ്രതാപന് മലബാറിന്റെ ചുമതല നൽകിയതിലുള്ള പ്രതിഷേധമാണ് ബോർഡ് സ്ഥാപിക്കാൻ കാരണമെന്നാണ് കരുതുന്നത്.
നടക്കാവിൽ ഇന്നലെ വൈകിട്ടാണ് ബോർഡ് സ്ഥാപിച്ചത്. ‘കോൺഗ്രസ് പോരാളികൾ’ എന്ന പേരിലാണ് ബോർഡ്. ലോക്സഭാ തെരഞ്ഞെടുപ്പിൽ സിറ്റിങ് എംപിയായ പ്രതാപനെ മാറ്റിയാണ് കെ. മുരളീധരനെ തൃശൂരിൽ സ്ഥാനാർഥിയാക്കിയത്. തെരഞ്ഞെടുപ്പിൽ ബിജെപി സ്ഥാനാർഥി സുരേഷ് ഗോപി വൻ ഭൂരിപക്ഷത്തിൽ ജയിക്കുകയും കെ. മുരളീധരൻ മൂന്നാം സ്ഥാനത്തേക്ക് തള്ളപ്പെടുകയും ചെയ്തു. ഇതോടെയാണ് ടി.എൻ. പ്രതാപനെതിരെ ശക്തമായ പ്രതിഷേധം ഉയർന്നത്.
