പഴയങ്ങാടി: കണ്ണൂർ കണ്ണപുരം അയ്യോത്ത് പ്ലൈവുഡ് ഫാക്ടറിയിൽ വൻ തീപിടിത്തം. സി. അബൂബക്കറിൻറെ ഉടമസ്ഥതയിലുള്ള സ്റ്റാർ ബോർഡ് ഇൻഡസ്ട്രീസ് എന്ന സ്ഥാപനത്തിൽ ഇന്നു പുലർച്ച 5.15 ഓടെയാണ് തീപിടിത്തമുണ്ടായത്.
പ്ലൈവുഡുകളും അസംസ്കൃത വസ്തുക്കളും യന്ത്രഭാഗങ്ങളും കത്തി നശിച്ചു. പ്ലൈവുഡ് നിർമാണത്തിനുപയോഗിക്കുന്ന സീസണിംഗ് ചേംബറിലുണ്ടായ തീപിടിത്തം മറ്റു ഭാഗങ്ങളിലേക്കും പടരുകയായിരുന്നു. താപനില ക്രമീകരിക്കുന്ന യന്ത്ര സംവിധാനത്തിൻറെ തകരാർ മൂലം സീസണിംഗ് ചേംബറിലെ താപനില ഉയർന്നതാകാം തീപിടിത്തിനിടയാക്കിയതെന്നാണ് പ്രാഥമിക നിഗമനം.
രാത്രിയിൽ ഫാക്ടറിയിൽ നിന്ന് തീയും പുകയും ഉയരുന്നത് ശ്രദ്ധയിൽപ്പെട്ട നാട്ടുകാർ ഉടൻ പോലീസിലും ഫയർഫോഴ്സിലും വിവരം അറിയിക്കുകയായിരുന്നു. തളിപ്പറമ്പ്, കണ്ണൂർ എന്നിവിടങ്ങളിൽ നിന്നെത്തിയ അഗ്നിരക്ഷാ സേനാംഗങ്ങളും കണ്ണപുരം പോലീസും ചേർന്ന് മണിക്കൂറുകൾ നീണ്ട പരിശ്രമത്തിനൊടുവിലാണ് തീയണച്ചത്. അപകടത്തിൽ ലക്ഷങ്ങളുടെ നഷ്ടം സംഭവിച്ചതായി കണക്കാക്കുന്നു.
