കൊച്ചി: കോതമംഗലത്ത് സിനിമാ ഷൂട്ടിങ്ങിനെത്തിച്ച നാട്ടാനകൾ തമ്മിൽ ഏറ്റുമുട്ടി. ഒരാഴ്ചയായി വടാട്ടുപാറയിൽ നടക്കുന്ന തെലുങ്ക് സിനിമയുടെ ഷൂട്ടിങ്ങിനായി എത്തിച്ചതായിരുന്നു നാട്ടാനകളെ. വെള്ളിയാഴ്ച വൈകിട്ട് അഞ്ച് മണിയോടെ കോതമംഗലം തുണ്ടം ഫോറസ്റ്റ് സ്റ്റേഷനു സമീപത്താണ് സംഭവം. പുതുപ്പള്ളി സാധു, മണികണ്ഠൻ എന്നീ ആനകളാണ് ഏറ്റുമുട്ടിയത്.
ഇതിൽ പരുക്കേറ്റ പുതുപ്പള്ളി സാധു കാട്ടിലേക്ക് ഓടിപ്പോയി. റിസർവ് ഫോറസ്റ്റിലേക്ക് കയറിപ്പോയ ആനയെ കണ്ടെത്താനായി വനം വകുപ്പ് ഉദ്യോഗസ്ഥരും പാപ്പാൻമാരും തിരച്ചിൽ തുടരുകയാണ്.
ഏറ്റുമുട്ടലിനിടെ മണികണ്ഠൻ എന്ന ആനയും കാട്ടിലേക്ക് കയറിയെങ്കിലും പിന്നീട് തിരിച്ചുവരികയായിരുന്നു. ഈ ആനയ്ക്ക് കാര്യമായ പരുക്കില്ല. മൂന്ന് പിടിയാനയെയും രണ്ടു കൊമ്പനാനകളെയുമാണ് ഷൂട്ടിങ്ങിന് എത്തിച്ചത്. മറ്റ് ആനകളെ വാഹനത്തിൽ തിരികെ കൊണ്ടുപോയി.
