ന്യൂഡൽഹി: ലൈഫ്, ഹെൽത്ത് ഇൻഷുറൻസ് എന്നിവയുടെ നികുതി നിരക്ക് കുറയ്ക്കുന്നതിനും ക്യാൻസർ മരുന്നുകൾക്കും നാംകീനുകൾക്കുമുള്ള ജിഎസ്ടി വെട്ടിക്കുറയ്ക്കുന്നതിനും നവംബറിൽ ചേരുന്ന ജിഎസ്ടി കൗൺസിൽ യോഗത്തിൽ തീരുമാനമുണ്ടാവുമെന്ന് കേന്ദ്രധനമന്ത്രി നിർമലാ സീതാരാമൻ.
54-ാമത് ജിഎസ്ടി കൗൺസിൽ യോഗത്തിൻ്റെ ഫലത്തെക്കുറിച്ച് മാധ്യമപ്രവർത്തകരോട് വിശദീകരിക്കുകയായിരുന്നു സീതാരാമൻ, ലൈഫ്, ഹെൽത്ത് ഇൻഷുറൻസ് എന്നിവയുടെ ജിഎസ്ടി നിരക്ക് പരിശോധിക്കാൻ മന്ത്രിമാരുടെ ഒരു സംഘത്തെ (ജിഒഎം) നിയമിക്കാൻ തീരുമാനിച്ചതായി പറഞ്ഞു.
ഒക്ടോബർ അവസാനത്തോടെ ജിഒഎം റിപ്പോർട്ട് സമർപ്പിക്കുമെന്നും അവർ പറഞ്ഞു. ആരോഗ്യ, ലൈഫ് ഇൻഷുറൻസ് പ്രീമിയങ്ങളെ ജിഎസ്ടിയിൽ നിന്ന് ഒഴിവാക്കണമെന്ന് ആവശ്യപ്പെട്ട് പ്രതിപക്ഷ അംഗങ്ങളുമായി പാർലമെൻ്റ് നടത്തിയ ചർച്ചയിൽ ഇൻഷുറൻസ് പ്രീമിയങ്ങളുടെ നികുതി സംബന്ധിച്ച വിഷയം ശ്രദ്ധയിൽപ്പെട്ടിരുന്നു. ഇക്കാര്യം ചൂണ്ടിക്കാട്ടി ഗതാഗത മന്ത്രി നിതിൻ ഗഡ്കരി സീതാരാമന് കത്തയച്ചു.
പിരിച്ചെടുക്കുന്ന ജിഎസ്ടിയുടെ 75 ശതമാനവും സംസ്ഥാനങ്ങൾക്കാണെന്നും പ്രതിപക്ഷ അംഗങ്ങൾ തങ്ങളുടെ സംസ്ഥാന ധനമന്ത്രിമാരോട് ഈ നിർദേശം ജിഎസ്ടി കൗൺസിലിൽ കൊണ്ടുവരണമെന്നും ധനകാര്യ ബില്ലിന്മേലുള്ള ചർച്ചയ്ക്കുള്ള മറുപടിയിൽ സീതാരാമൻ പറഞ്ഞിരുന്നു.
തിങ്കളാഴ്ച ചേർന്ന ജിഎസ്ടി കൗൺസിൽ യോഗത്തിൽ ക്യാൻസർ മരുന്നുകളുടെ നികുതി 12 ശതമാനത്തിൽ നിന്ന് 5 ശതമാനമായും നാംകീനുകൾ 18 ശതമാനത്തിൽ നിന്ന് 12 ശതമാനമായും കുറയ്ക്കാൻ തീരുമാനിച്ചു.
2026 മാർച്ചിന് ശേഷം നിർത്തലാക്കുന്ന നഷ്ടപരിഹാര സെസ് സംബന്ധിച്ച പ്രശ്‌നം കൈകാര്യം ചെയ്യാനും ഒരു ജിഒഎം രൂപീകരിക്കുമെന്നും സീതാരാമൻ പറഞ്ഞു. ഓൺലൈൻ ഗെയിമിങ്ങിൽനിന്നുള്ള വരുമാനം 412 ശതമാനം വർധിച്ചു 6,909 കോടിയായി. ആറുമാസത്തിലാണ് ഈ തുക ലഭിച്ചതെന്നും മന്ത്രി വ്യക്തമാക്കി.
നിലവിൽ നെഗറ്റീവ് ബാലൻസ് നേരിടുന്ന ഐജിഎസ്ടിയെക്കുറിച്ച് അഡീഷണൽ സെക്രട്ടറി (റവന്യൂ) നേതൃത്വത്തിൽ സെക്രട്ടറിമാരുടെ സമിതി രൂപീകരിക്കുമെന്നും മന്ത്രി പറഞ്ഞു. സംസ്ഥാനങ്ങളിൽ നിന്ന് പണം തിരിച്ചുപിടിക്കാനുള്ള വഴികൾ പരിശോധിക്കുമെന്നും കേന്ദ്രധനമന്ത്രി അറിയിച്ചു. കേന്ദ്ര- സംസ്ഥാന സർവകലാശാലകൾക്കുള്ള ജിഎസ്ടി ഒഴിവാക്കി. തിങ്കളാഴ്ച കേന്ദ്രധനമന്ത്രി നിർമലാ സീതാരാമന്റെ അധ്യക്ഷതയിൽ ചേർന്ന യോഗത്തിൽ വിവിധ സംസ്ഥാനങ്ങളിലെ ധനമന്ത്രിമാർ പങ്കെടുത്തു.
